Über isern BosinGin


"Mir honds gschafft, s Baisinger Lebensgfühl ins Glas zu bringa. S Rauchig vom Speck, s würzig vu Wacholder und Lorbeer, s Frische vu Früchta"

Isern Gin spiegelt isre Hoamat - bodaständig, freundlich, a weng rauchig.

 

Isre Hoamat Baisinga isch fescht in da Haad vom Schwarzwälder Speck. 1800 Iwohner und fascht so veil Metzga. Da berühmte Baisinger Speck goht quasi um d Welt. Und weil er so lecker isch, ghert er nit nu auf da Deller, sondern au is Glas. Mir sind vor da Herausforderung gschdanda, die typischa Aroma vu Speck und Gin mitanadner zu vubinda.

 

A Verfahra, wo mir is i Mexiko abguckt hond, hät is uff da richtig Weag gführt. Selt wird beim Brenna vu ma ganz hochwertiga Mezcal a Hühnerbruschd id Brennblås ghekt, zum im Brand no komplexere Aroma zuafüga. Warum soll mr des it au mit Speck vusuacha?!

Also hommr is beim hiasiga Metzger (geit jo a baar) Schwarta bsorgt, dammer dia id Brennblås heeka kennad. Beim Brennt strömt s Deschtillat dra vubei und nimmt da würzig-rauchige Gschmack uff. Dazua no a baar hochwertige Botanicals, zum da Gschmack abzurunda und fertig war iser erschda Gin. Er war guat, aber vu da Würze und im Rauch vum Speck war fasch nix zum Schmecka. Z wenig Schwarta i da Brennblås. A weng ausdauschbar. Also nääschda Vusuach. Meh Schwarta, wenigar Koriander, meh Zitrus, koane Rosablüta.

 

S Ganze isch dann no fascht zwoa Monat ganga, bis mr mitm Ergäbnis zfridda waret.

 

Mir honds gschafft, s Baisinger Lebenfgfühl ins Glas zu bringa. S Rauchig vom Speck, s Würzig vu Wacholder und Lorbeer, s Frische vu Früchta. A Gedicht mit Tonic und Gurk, oder oafach pur uff Eis.